NepalWatch

News Portal For Eeverything In Nepal from Nepal

२०८० फागुन १९ गते

एमसिसीबारे छलफल गर्न गठबन्धन दलको बैठक बस्दै

काठमाडौं ।  अमेरिकी सहयोग परियोजना (एमसिसी) बारेको छलफलमा आज पनि सत्ता साझेदार दल जुट्ने भएका छन् । यसबारे मतैक्यता निर्माण गर्ने प्रयत्नले आकार लिन नसकेपछि आज पनि सत्ता साझेदार दल छलफलमा बस्न लागेका हुन् ।

बैठक दिउँसो ३ बजे बस्ने छ ।

एमसिसीलाई लिएर सत्ता साझेदार दलबीच तीव्र विवाद छ । नेपाली कांग्रेस संसद्बाट पास गरिहाल्ने पक्षमा छ भने माओवादी केन्द्र र एकीकृत समाजवादी संशोधनपछि मात्रै अनुमोदन हुनुपर्ने अडानमा छन् । माओवादीले त यही अवस्थामा एमसिसी प्रतिनिधिसभामा पेश गरिएमा सरकारबाटै बाहिरिने चेतावनी दिइसकेको छ । केही दलचाहिँ एमसिसी खारेज नै हुनुपर्ने लाइनमा छन् ।

एमसिसी प्रस्ताव बुधबार नै प्रतिनिधिसभामा पेश गर्ने तयारी थियो । तर सत्ता साझेदार दलबीचको मतान्तरकै कारण स्थगित भएको छ ।

प्रतिनिधिसभाको आगामी बैठक भोलि (शुक्रबार) का लागि तय गरिएको छ । जसमा सहमति जुटाएर एमसिसी प्रस्ताव पेश गर्ने सरकारको तयारी छ ।