काठमाडौं । स्थानीय तहको निर्वाचनमा तालमेल गरेर जाने सैद्धान्तिक सहमति गरेका सत्ता गठबन्धनमा आबद्ध दलहरूले सिट बाँडफाँटको मापदण्डबारे फरक फरक प्रस्ताव अघि सारेका छन् ।

गठबन्धनमा रहेका कांग्रेस, माओवादी केन्द्र, एकीकृत समाजवादी, जनता समाजवादी पार्टी र राष्ट्रिय जनमोर्चाका शीर्ष नेताहरूले आफूअनुकूल तालमेल प्रस्ताव ल्याएको कान्तिपुरमा खबर छ ।

समाचारअनुसार, कांग्रेसले गत निर्वाचनमा प्रमुख जसले जहाँ जितेको छ, उसले लिने र एमालेसहित अन्य दलले जितेको ठाउँमा दोस्रो धेरै मत पाएको दलले प्रमुख लिने गरी प्रस्ताव गरेको छ ।

माओवादी केन्द्रको मतचाहिँ ०७४ मा जसले जहाँ जितेको छ, उसले लिने र एमालेले जितेका ठाउँमा गठबन्धनमा रहेका दलहरूको संसदीय शक्तिअनुसार भागबण्डा गर्नेछ ।

नेकपा एसले ०७४ मा एमालेले जितेका सिट आफूले पाउनुपर्ने दाबी गरेको छ । त्यसो नभए एमालेलाई हराउन सक्ने शक्ति र संसदको शक्तिअनुसार सिट छुट्याउनुपर्ने उसको राय छ ।

०७४ को निर्वाचनपछि विभिन्न पार्टीबीच एकीकरण भएकाले नयाँ शक्ति सन्तुलनअनुसार सिट टुंग्याउनुपर्ने जसपाको धारणा छ । आफ्नो प्रभाव रहेका प्यूठान, बागलुङ, अर्घाखाँचीलगायत जिल्लामा आफूहरूले नेतृत्व पाउनुपर्ने जनमोर्चाको दाबी छ ।