काठमाडौं । आगामी जेठ २२ देखि २८ का लागि तय नवौं राष्ट्रिय खेलकुद परिषद्को लोगो, मस्कट र नारा सार्वजनिक गरिएको छ । युवा तथा खेलकुद मन्त्री महेश्वरजंग गहतराज र राष्ट्रिय खेलकुद परिषद्का सदस्य सचिव टंकलाल घिसिङले शनिबार लोगो, मस्कट र नारा सार्वजनिक गरेका हुन् ।

नवौं खेलकदुको नारा एकताबद्ध देश, खेलकुदको सन्देश राखिएको छ । मस्कटका रूपमा यसपटक कस्तुरी मृग छानिएको छ । लोगो चन्द्र, सूर्य र माछापुच्छे हिमाल समेटेर तयार गरिएको छ ।

युवा तथा खेलकुद मन्त्रालयले यही वैशाख ४ गते नवौ खेलकुदका लागि लोगो, मस्कट, नारा र गीत निर्माण गर्न आह्वान गर्दै उत्कृष्टलाई पुरस्कार गर्ने घोषणा गरेको थियो । जसअनुसार कलाकार भोलानाथ पौडेलले निर्माण गरेको लोगो, शुयोग्यराज काफ्लेले लेखेको नारा छनोटमा परेको छ। गीतका लागि पनि एकैसाथ आवेदन गरिएकोमा सुहाउँदो नभेटिएपछि छनोट नगरिएको जनाइएको छ ।

नवौं राष्ट्रिय खेलकुद प्रतियोगिता आगामी जेठ २२ देखि २८ सम्म गण्डकी प्रदेशमा आयोजना हुनेछ ।