काठमाडाैं । कंगोमा चर्किएको द्वन्द्वका कारण तीन जना शान्ति सैनिकले ज्यान गुमाएको संयुक्त राष्ट्र संघले पुष्टि गरेको छ । आक्रमणबाट अन्य केही सैनिक घाइते भएका छन् । त्यहाँ रहेका नेपाली सैनिकहरु भने सुरक्षित रहेको जनाएको छ ।

कंगोको पूर्वी सहर बुटेम्बोमा रहेको राष्ट्र संघीय टोलीका दुई शिविरमा झडप हुँदा सैनिकहरुसहित १५ जना प्रदर्शनकारी मारिएको बताइएको छ ।

राष्ट्र संघका महासचिव एन्टोनियो गुटरेसले शान्ति सैनिकमाथि गरिएको आक्रमण युद्ध अपराध हुन सक्ने भन्दै कंगो सरकारलाई घटनाको अनुसन्धान गर्न आग्रह गरेका छन् ।

राष्ट्र संघको शान्ति मिसन मोनुस्कोले प्रदर्शनकारीको भेषमा आएर हिंसा गरेको र राष्ट्रसङ्घका सम्पत्ति लुटपाट भएको आरोप लगाएको छ ।

ती आक्रमणकारीहरुले कंगोका प्रहरीको हतियार खोसेर गोली चलाएका थिए ।

खनिज पदार्थमा धनी कंगोको पूर्वी भागमा दशकौंदेखि सशस्त्र समूहहरू सक्रिय छन् । तिनले गर्ने हिंसात्मक गतिविधि नियन्त्रण गर्न नसकेको भन्दै कंगोमा मोनुस्कोप्रति आक्रोश व्यक्त हुँदै आएको छ ।