काठमाडौं । अन्ततः १० वर्षपछि हिमालयन बैंक तथा बैंक अफ काठमाण्डू (बिओके) ले मेलम्ची खानेपानी आयोजनामा राखेको काउन्टर ग्यारेन्टीबापतको अग्रिम भुक्तानीको मुद्दा जितेका छन् ।

लामो कानूनी लडाइँपछि मुद्दा जितेको तथा अब नेपाली बैंकले आफ्नो पैसा फिर्ता पाउने कुरामा ढुक्क भएको हिमालयन बैंकका प्रमुख कार्यकारी अधिकृत अशोक राणाले बताए ।

‘सायद १० दिनभित्रमा जमानत रकम फिर्ता हुन्छ होला,’ राणाले भने ।

यो फैसलासँगै दुबै बैंकले काउन्टर ग्यारेन्टीबापत मेलम्ची खानेपानी आयोजनालाई भुक्तानी गरिदिएको जमानत रकम फिर्ता पाउने भएका छन् ।

अमेरिकी डलर ६६ लाख २५ हजार र १४ लाख ११ हजार ४५३ युरो (करिब १ अर्ब २ करोड रूपैयाँ) रकम बैंक अफ काठमाण्डूले फिर्ता पाउने प्रमुख कार्यकारी अधिकृत श्रवण मास्कीले जानकारी दिए, कारोबार दैनिकमा खबर छ ।