काठमाडौं । भारतीय प्रधानमन्त्री नरेन्द्र मोदीले फ्रान्सका राष्ट्रपति इमानुएल म्याक्रोनसँग फोन वार्ता गरेका छन्। यस क्रममा प्रधानमन्त्री मोदीले फ्रान्सको जंगलमा लागेको भीषण आगलागी र खडेरीको अवस्थासँग जुध्न सहयोग गर्ने आश्वासन दिएका थिए ।

‘आज मैले मेरा मित्र र राष्ट्रपति इमानुएल म्याक्रोनसँग कुरा गरें। फ्रान्सको जंगलमा लागेको भीषण आगो निभाउनका लागि भारतको सहयोगको आश्वासन दिएँ। भारत–फ्रान्स रणनीतिक साझेदारीअन्तर्गत चलिरहेको द्विपक्षीय सहयोग तथा विश्वव्यापी र क्षेत्रीय महत्वका अन्य मुद्दाहरूमा छलफल गर्यौं,’ मोदीले ट्विट गरेका छन् ।

मोदीले फ्रान्सका राष्ट्रपतिसँग खाद्य र ऊर्जा सुरक्षाजस्ता विश्वव्यापी चुनौतीसँग जुध्न सहयोग गर्ने सहमति भएको पनि बताएका छन् ।

समाचार एजेन्सी पीटीआईले पीएमओद्वारा जारी एक विज्ञप्तिलाई उद्धृत गर्दै दुई नेताहरूले महत्त्वपूर्ण भूराजनीतिक चुनौतीहरू र नागरिक आणविक ऊर्जा सहयोगबारे छलफल गरेको उल्लेख गरेको छ।