काठमाडौं । बेलायतमा जाने नेपाली नर्सले मासिक ४ लाख रूपैयाँसम्म पारिश्रमिक पाउने भएका छन् । त्यहाँको कानूनअनुसार लाइसेन्स लिएपछि नेपाली नर्सले वार्षिक ४८ लाख रूपैयाँ (२७ हजारदेखि ३२ हजार पाउण्ड) सम्म तलब पाउने नेपाल र बेलायत सरकारबीच सम्झौता भएको छ ।

श्रम मन्त्रालयका अनुसार, बेलायतको नर्सिङ एण्ड मिडवाइफरी काउन्सिल (एनएचएस) मा दर्ता भएपछि मात्रै यो तलबसुविधा पाइनेछ ।

‘यहाँबाट सहायक स्वास्थ्यकर्मीका रूपमा छनोट हुन्छ । बेलायतको नर्सिङ काउन्सिलबाट पास भएपछि मात्रै दर्तावाल नर्स भइन्छ,’ मन्त्रालयका सहायक प्रवक्ता थानेश्वर भुसालले भने ।

नेपाल नर्सिङ काउन्सिलमा दर्ता भएका २० देखि ४५ वर्ष उमेर समूहका नर्स भर्ना प्रक्रियामा सहभागी हुन पाउनेछन् । प्रतिस्पर्धा गर्न आईईएलटिएसमा औसत ७ र ओइटीमा ‘बी’ अंक ल्याउनुपर्छ । छनोट भएर गएका स्वास्थ्य हेरचाहकर्मीले बेलायत पुगेको ८ महिनाभित्र स्वास्थ्यसँग सम्बन्धित व्यावहारिक वस्तुपरक परीक्षा उत्तीर्ण गर्नुपर्छ । यसका लागि तीनपटकसम्म परीक्षाको मौका दिइनेछ । तीनैपटक रद्द हुन नसके भिसा रद्द हुने भुसालले बताए । त्यसरी दर्तावाल नर्सले सीप र क्षमताका आधारमा ५ वर्ष वा त्योभन्दा बढी अवधि काम गर्न पाउनेछन् । भर्नाको प्रक्रिया अनलाइनबाट हुनेछ, कान्तिपुर दैनिकमा खबर छ ।