काठमाडौं । नेपाली क्रिकेटका कप्तान सन्दीप लामिछानेमाथि लागेको बलात्कारको आरोपबारे समाचार अब अन्तर्राष्ट्रिय सञ्चारमाध्यमको पनि चासोको विषय बनिसकेको छ ।

मंगलबार १७ वर्षिया किशोरीले बलात्कारको आरोप लगाउँदै स्टार क्रिकेटर लामिछानेविरूद्ध प्रहरीमा जाहेरी दिएकी थिइन् । नाबालिकाले लगाएको यो आरोपबारे यतिबेला भारतीय मिडियाले चासोका साथ समाचार सम्प्रेषण गरेका छन् ।

एक दिवसीय खेल(ओडिआइ) खेलेका कारण सन्दीपको भारतमा पनि राम्रो क्रेज छ । भारतको चर्चित न्यूज च्यानल जी न्यूजले क्याप्टेन शब्दलाई बोल्ड रूप दिँदै लेखेको छ, ‘यी आइपीएल स्टार तथा अन्तर्राष्ट्रिय क्रिकेट क्याप्टेनमाथि नाबालिका बलत्कारको आरोप’ ।

त्यस्तै, न्यूज १८ अनलाइनले, ‘नेपाली स्टार लेगस्पिनर लामिछानेलाई नाबालिक बलात्कारको आरोप, अनुसन्धान जारी’ भनेर लेखेको छ । त्यस्तै, क्रिकट्राकर नामक अनलाइनले लेखेको छ, ‘नेपाली कप्टान सन्दीप लामिछानेविरूद्ध १७ वर्षिया किशोरीको बलात्कार उजुरी’ ।