काठमाडाैं । संयुक्त राष्ट्रसंघका महासचिव एन्टोनियो गुटेर्रेसले पाकिस्तानको भ्रमण गर्ने भएका छन् । यही सेप्टेम्बर ९ र १० मा उनले पाकिस्तानको भ्रमण गर्ने तय भएको राष्ट्रसंघीय अधिकारीहरूले जानकारी दिएका छन् ।

अत्यधिक वर्षाका कारण देशभरी धेरै क्षति भएकाले त्यसप्रति सहानुभूति जनाउन राष्ट्रसंघीय प्रमुख गुटेर्रेस पाकिस्तान आउन लागेका हुन् ।पाकिस्तानमा पछिल्लो समय आएको बाढी पहिरोका कारण हजारौँको मृत्यु भएको छ भने लाखौँ प्रभावित भएका छन् ।

बाढी पहिरोले भौतिक संरचनामा समेत ठूलो क्षति पुर्याएकोले लाखौँ मानिस अझै पनि विस्थापित अवस्थामै रहेका छन् । विस्थापित भएकाहरूको उचित व्यवस्थापन नभएकाले उनीहरूमा खाद्य अभाव, स्वास्थ्य समस्या र अन्य आधारभूत सेवा तथा सुविधाको अभाव देखिएको छ ।

प्रभावित क्षेत्रका बासिन्दालाई सहानुभूति दिनका लागि उहाँले प्रभावित क्षेत्रको स्थलगत भ्रमण गर्ने र स्थानीयसँग सामान्य अन्तरक्रिया पनि गर्ने जनाइएको छ । उनले पाकिस्तानमा उत्पन्न संकटप्रति विश्वको ध्यान खिच्न र आवश्यक सहयोग जुटाउन भ्रमण गर्न लाग्नु भएको अधिकारीहरूले जनाएका छन् ।

विश्व स्वास्थ्य संगठन (डब्लुएचओ)ले यसअघि नै पाकिस्तानमा प्राकृतिक प्रकोप, जलवायु परिवर्तन लगायतका कारणले मानवीय संकट उत्पन्न हुन सक्ने चेतावनी दिएको छ । ‘हामीले पाकिस्तान भित्रको अवस्थालाई नजिकबाट गहिरोसँग निकालीरहेका छौँ, घातक वर्षाका कारण धेरै पक्षमा असर परेको छ, त्यसको प्रभाव अझै पनि धेरै पर्न सक्ने देखिएको छ,’ डब्लुएचओका क्षेत्रीय निर्देशक डा अहमद अल मान्धरीले भने ।

पाकिस्तानमा केही समय अगाडिको वर्षा र त्यसले पारेको असर हेर्दा विगतमा कहिल्यै नभएको जस्तो बढी देखिएको उनको भनाई छ । बर्षा, बाढी, पहिरो र त्यसको असरको मात्रा हेर्दा जलवायु परिवर्तनको प्रभाव प्राकृतिक प्रकोपका रुपमा देखिएको डा मान्धरीको बुझाई छ ।

उनका अनुसार पछिल्लो बाढी पहिरोका कारण दशौँ लाख मानिस जवरजस्त असुरक्षित पानी प्रयोग गर्न वाध्य भएका छन् । अस्वस्थ पानी पिउने र अन्य प्रयोजनका लागि प्रयोग गर्ने कार्यले उनीहरूको स्वास्थ्यमा प्रत्यक्ष नकारात्मक असर पर्ने गरेको र मानवीय क्षति बढाउने गरेको उनले बताए ।