काठमाडौं । प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले शुक्रबारदेखि सुरु हुने नवौं राष्ट्रिय खेलकुद आफूले हेर्ने बताएका छन् ।

पूर्वप्रधानमन्त्रीसमेत रहेका ओलीले शुक्रबार सामाजिक सञ्जालमार्फत खेलाडीहरूलाई सफलताको शुभकामना दिँदै खेल हेर्न पोखरा रंगशालामा जान नपाए पनि घरमै बसेर हेर्ने बताएका छन् ।

‘खेलाडी साथीहरू ! नवौं राष्ट्रिय खेलकूद प्रतियोगिता सफलताको तपाईंहरू सबैलाई भब्य शुभकामना,’ उनले लेखेका छन्, ‘पोखरा रंगशालामा आउन नपाए पनि तपाईंहरूको खेल म हेर्नेछु ।’

नवौं राष्ट्रिय खेलकुद प्रतियोगिता औपचारिक रुपमा शुक्रबारदेखि सुरु हुँदैछ ।

प्रतियोगिता अन्तर्गतका खेलहरू एक महिना अघिदेखि नै जारी रहे पनि औपचारिक उदघाटन समारोह भने शुक्रबारमात्र हुन लागेको हो ।

अपराह्न साढे ३ बजे पोखरा रंगशालामा उपराष्ट्रपति नन्दबहादुर पुनले प्रतियोगिता उदघाटन गर्नेछन् ।