काठमाडौं । काठमाडौं महानगरपालिकाले थापाथलीमा डोजर चलाएको छ । सो क्षेत्रमा रहेका अनधिकृत संरचना हटाउन महानगरले शुक्रबार डोजर चलाउन सुरु गरेको हो ।

महानगरले सुकुम्बासी बस्ती नजिकै निर्माण भएका अनधिकृत संरचना हटाइरहेको महानगर प्रहरी उपरीक्षक दिनेश अर्यालले जानकारी दिए ।

उनका अनुसार महानगरले अधिकार सम्पन्न बागमती सभ्यता एकीकृत विकास समितिसँगको समन्वयमा थापाथलीदेखि युएन पार्कको पुल आउने क्षेत्रसम्ममा रहेका अनधिकृत संरचना हटाइरहेको छ ।

सो क्षेत्रमा क्रियापुत्री भवन, ओम शान्तिको भवन, रुद्रेश्वर मन्दिरको पुजारी भवन लगायतका संरचना अनधिकृत रहेको बताइएको छ ।

अवैध संरचना भत्काउने मेयर बालेन शाहको अभियान शुक्रबार थापाथलीमा पुगेको हो ।

यसअघि, बानेश्वर, न्युरोड, बालाजुलगायतका थुप्रै क्षेत्रमा महानगरको डोजर पुगिसकेको छ ।