काठमाडाैं । भारत सरकारले डिजेल र हवाई इन्धन (एटीएफ) निकासीमा पुन: कर लगाएको छ । भारतको अर्थ मन्त्रालयले शनिबार एक सूचना जारी गर्दै कर वृद्धि भएको जानकारी दिएको भारतीय सञ्चारमाध्यमले जनाएका छन् ।

भारतले डिजेलमा बढाएको करको प्रत्यक्ष असर नेपाललाई पर्ने सम्भावना छ । पेट्रोलियम पदार्थको उच्च मूल्यको मार खेपिरहेका नेपालीले पुन: डिजेलमा कर लगाउँदा यसको थप मार खेप्नुपर्ने छ ।

कर बढेसँगै अब डिजेल निर्यातमा प्रतिलिटर (भारू) १० रुपैयाँ ५० पैसा पुगेको छ । सडक तथा पूर्वाधारमा १.५० रुपैयाँ कर लाग्ने अर्थात् डिजेलमा निकासीमा कुल कर अब प्रतिलिटर १२ रुपैयाँ पुगेको छ भने एटीएफमा अब प्रतिलिटर ३ रुपैयाँ ५० पैसा लाग्ने भएको छ ।

पछिल्लो समय विश्वमा कच्चा तेलको मूल्यमा भएको वृद्धिलाई ध्यानमा राख्दै यस पटक कच्चा तेल, डिजेल र एटीएफमा भन्सार बढाउने निर्णय गरिएको भारतीय सरकारले जनाएको छ ।

भारतले यसभन्दा अघि जुलाई १, २०२२ मा पेट्रोलियम पदार्थको निर्यातमा कर लगाएको थियो । पेट्रोलमा लगाएको कर भने पहिले नै हटिसकेको छ ।