काठमाडौं । भक्तपुर १ नेपाल मजदुर किसान पार्टी (नेमकिपा) को गढ हो । त्यहाँ केही दशकदेखि यो दलको एकछत्र राज छ । त्यसैले यहाँ नेमकिपाको स्थान अन्य दलले लिने अनुमानसम्म गरिदैन ।

तर आइतबार सम्पन्न प्रतिनिधिसभा निर्वाचनमा यो क्षेत्रमा नेमकिपाको जनाधार खस्किएको देखिएको छ । जारी मतगणनामा एमाले उम्मेदवारले नेमकिपाका उम्मेदवारलाई फराकिलो अन्तरमा पछि पारेका छन् ।

नेमकिपाले भक्तपुर १ मा प्रेम सुवाललाई उम्मेद्वार बनाएको थियो । ०७४ मा उनी यही क्षेत्रबाट निर्वाचित भएका थिए । तर यस पटक सुवाललाई एमालेका नवराज गेलालले पछि पारेका छन् । भर्खरै प्राप्त ताजा नतिजामा गेलालले ६८१७ मत हासिल गर्दा सुवाल ५२५९ मतका साथ उनलाई पछ्याइरहेका छन् ।

भक्तपुर २ मा पनि मतगणना जारी छ । यहाँ भने कांग्रेस एमालेबीच प्रतिस्पर्धा देखिएको छ ।