काठमाडौं । मधेस प्रदेशमा जनता समाजवादी पार्टीको संसदीय दलको नेतामा सरोजकुमार यादव सर्वसम्मत चुनिएका छन्।

दलको नेतामा जसपाबाट मुख्यमन्त्रीसमेत रहेका लालबाबु राउत र यादवले दाबी नछाड्दा सोमबार जसपाले मतदान गर्ने निर्णय गरेको थियो । तर अन्तिम समयमा राउतले आफ्नो दाबी फिर्ता लिएपछि यादव सर्वसम्मत दलका नेता चयन भएका हुन् ।

सभामुखसमेत रहेका यादव मधेश प्रदेशका मुख्यमन्त्री हुने लगभग पक्कापक्की भएका छन् । सत्ता गठबन्धनको आइतबार बसेको शीर्ष नेताहरूको बैठकले मधेश प्रदेशमा जसपा र जपाबीच आलोपालो सरकार सञ्चालन गर्ने सहमति भएको थियो ।

पहिलो चरणमा १६ सिट रहेको जसपाले सरकार बनाउने सहमति भएको छ । दोस्रो चरणमा जनमत पार्टीले सरकार बनाउने छ । मंसिर ४ मा भएको प्रदेश सभा निर्वाचनमा जपाले १३ सिट जितेको थियो ।