मस्को । रुसले नयाँ रणनीतिक हतियार न्यूनीकरण सन्धि (नयाँ स्टार्ट) को पालना नगरेको भन्दै संयुक्त राज्य अमेरिकाले गरेको दाबीलाई मस्कोले दृणतापूर्वक अस्वीकार गरेको छ ।

रुसी विदेश मन्त्रालयले बुधबार विज्ञप्ति जारी गर्दै उल्लेख गरेको छ, ‘रूसी पक्षले नयाँ स्टार्टका प्रावधानहरूसँग हाम्रो देशको अनुपालन नगरेकोु सम्बन्धमा अमेरिकी प्रतिनिधिहरूले गरेको दावीलाई स्पष्ट रूपमा अस्वीकार गर्दछ ।’

‘हामी संयुक्त राज्य अमेरिकाको शत्रुतापूर्ण कार्यहरू अनुत्तरित छोड्ने पक्षमा छैनौं ।’ संयुक्त राज्य अमेरिकाले रुसलाई अमेरिकी भूमिमा निर्वाध निरीक्षण गर्ने सबै अवसरहरूमाथि प्रतिबन्ध लगाएको छ, जसले गर्दा सन्धिको उल्लंघन भएको छ।

यो सन्धि अविभाज्य सुरक्षाको सिद्धान्त र पारस्परिक विश्वास, खुलापन र भविष्यवाणीको आधारमा रणनीतिक सम्बन्ध निर्माण गर्ने अवधारणाद्वारा निर्देशित भए पनि संयुक्त राज्य अमेरिकाका नीतिहरू आफेमा विरोधाभाषपूर्ण छन् ।

‘रूसी पक्षले अन्तरराष्ट्रिय सुरक्षा र स्थायित्व कायम राख्नको लागि एक उपकरणको रूपमा स्टार्टप्रति आफ्नो अटल प्रतिबद्धतालाई पुनस् पुष्टि गर्दछ ।’ विज्ञप्तिमा भनिएको छ ।

नयाँ स्टार्ट अनुसार दुई आणविक महाशक्तिहरू बीचको अन्तिम बाँकी रहेको आणविक हतियार नियन्त्रण सन्धिलाई दुई देशको सहमतिमा अधिकतम पाँच वर्षसम्म लम्ब्याउन सकिन्छ। रूस र संयुक्त राज्य अमेरिकाले सन् २०२१ फेब्रुअरी ३ मा आधिकारिक रूपमा पाँच वर्षको लागि सन्धि विस्तार गरेका थिए ।