काठमाडौं । पाकिस्तानमा फेरि अर्को आतंकवादी आक्रमण भएको छ । घटनामा नौ प्रहरीको मृत्यु भएको छ ।

पाकिस्तानको बलुचिस्तान प्रान्तको बोलान क्षेत्रमा विस्फोट भएको हो । पाकिस्तानी सञ्चारमाध्यमले सरकारी अधिकारीलाई उद्धृत गर्दै नौ प्रहरीको मृत्यु भएको जनाएका छन् ।

प्रारम्भिक अनुसन्धानले आत्मघाती आक्रमण भएको हुनसक्ने देखाएको छ । तर पुष्टि हुन बाँकी छ ।

पाकिस्तानी सञ्चारमाध्यमका अनुसार, बलुचिस्तानका प्रहरी कर्मचारी ड्युटीबाट फर्किरहेका बेला विस्फोट भएको थियो । विस्फोटले प्रहरीको गाडीसमेत पल्टिएको छ ।

घटनामा १५ प्रहरी घाइते भएको र उनीहरूलाई उद्धार गरेर विभिन्न अस्पताल पुर्याइएको डन न्युजले जनाएको छ ।