काठमाडौं । राष्ट्रपतिमा कुनै पनि उम्मेदवारलाई मतदान नगरेको राष्ट्रिय प्रजातन्त्र पार्टी (राप्रपा) उपराष्ट्रपतिको निर्वाचनमा पनि तटस्थ बस्ने भएको छ ।

राप्रपाको यही बुधबार सम्पन्न केन्द्रीय कार्यसम्पादन समिति बैठकले उपराष्ट्रपति निर्वाचनमा कुनै पनि उम्मेदवारलाई मत नहाल्ने निर्णय लिएको हो ।

यसअघि फागुन २५ मा सम्पन्न राष्ट्रपति निर्वाचनमा पनि राप्रपाले मतदान नगर्ने निर्णय लिएको थियो ।

उपराष्ट्रपतिको निर्वाचन अहिले बिहान १० बजेदेखि ३ बजेसम्म हुँदैछ । सो पदका लागि अष्टलक्ष्मी शाक्य, रामसहायप्रसाद यादव र ममता झा प्रतिस्पर्धामा छन् । उनीहरू क्रमशः एमाले, आठदलीय गठबन्धन र जनमत पार्टीको समर्थनमा उम्मेदवार बनेका हुन् ।