माधव नेपाललाई धक्का, तेस्रो वरीयताका नेताले छाडे साथ
काठमाडौं । माधवकुमार नेपाल नेतृत्वको एकीकृत समाजवादीका वरिष्ठ नेता मुकुन्द न्यौपानेले पार्टी परित्याग गरेका छन् ।
पूर्वमन्त्रीसमेत रहेका न्यौपानेले शनिबार पत्रकार सम्मेलन आयोजना गरेर एकीकृत समाजवादीबाट अलग भएको घोषणा गरेका हुन् ।
एकीकृत समाजवादीको भविष्य नदेखिएको र त्यहाँ रहनुभन्दा सम्मानित नागरिक भएर बस्नु उपयुक्त देखेर आफूले यस्तो निर्णय लिएको उनले बताए । एकीकृत समाजवादी कम्युनिस्ट आचरण त्यागेर दक्षिणपन्थी दलको सेवक बनेको आरोप पनि उनले लगाए ।
‘एकीकृत समाजवादी दक्षिणपन्थी दलको सेवक बनेको छ । अर्कातिर यसको भविष्य पनि छैन । त्यहाँ रहनुभन्दा सम्मानित नागरिक भएर बाँच्नु उपयुक्त लागेर यो निर्णय लिएको हुँ,’ उनले पार्टी परित्याग गर्नुको कारणबारे बोल्दै भने ।
न्यौपाने एकीकृत समाजवादीका अध्यक्ष माधव नेपाल र झलनाथ खनालपछिको वरीयताका नेता हुन् । केही समयदेखि एमालेसँग पार्टी एकताको पक्षमा खुलेका उनलाई समाजवादीले स्पष्टीकरणसमेत सोधेको थियो । त्यसको जवाफ नदिई शनिबार उनले पार्टी परित्यागको घोषणा गरेका हुन् ।
यसले भर्खरै स्थापना भएको एकीकृत समाजवादीलाई गम्भीर धक्का पुग्ने ठानिएको छ । न्यौपाने स्वयंले पनि पत्रकार सम्मेलनमा नेकपा एसका दुई तिहाइ नेता तथा कार्यकर्ता एमाले फर्कंन लागेको दाबी गरे । सम्मानित स्थान पाए नेता झलनाथ खनाल स्वयं एमाले फर्र्कने उनको जिकिर छ ।
एकीकृत समाजवादी परित्याग गरेका न्यौपाने छिट्टै एमाले प्रवेश गर्ने तयारीमा छन् । स्वतन्त्र रहेर एकीकृत समाजवादीका नेता तथा कार्यकर्तालाई एमाले फर्काउन आफूले संयोजन गर्ने र केही समयपछि पुरानो पार्टीमा फर्कंने उनले जानकारी दिए ।
ताजा अपडेट
-
नेपाल प्रहरी र सशस्त्र प्रहरीका कर्मचारीले १६ वर्षमै पेन्सन पाउने
-
पोखराको प्राइम सहकारीमा डेढ अर्ब हिनामिना, अध्यक्षसहित आठ पक्राउ
-
लागूऔषध मुद्दामा ७७ जना पक्राउ
-
‘प्रधानमन्त्री छोरी आत्मनिर्भर कार्यक्रम’ सञ्चालन गरिने
-
पाठेघर क्यान्सरविरुद्ध खोपलाई जिल्ला अस्पतालसम्म बिस्तार गरिने
प्रतिक्रिया