काठमाडौं (एजेन्सी) । प्यालेस्टाइन क्षेत्रबाट मङ्गलबार इजरायली भूमिमा रकेट प्रहार गरेपछि इजरायली वायुसेनाले गाजा पट्टीमा चरमपन्थी स्थानहरूमा हवाई आक्रमण थालेको छ ।

इजरायली सेनाका अनुसार यी हवाई आक्रमणमा गाजा प्रशासन सञ्चालन गर्ने प्यालेस्टिनी संगठन हमासलाई निशाना बनाइएको छ ।

इजरायली सेनाका अनुसार हमासका हतियार भण्डार र तालिम केन्द्रमा बम विष्फोट भइरहेको छ । यो पछिल्लो तनाव इजरायलको हिरासतमा एक प्रसिद्ध प्यालेस्टिनी कैदीको मृत्युपछि सुरु भएको हो।

प्यालेस्टाइन कैदी कादर अदनानको भोक हडतालमा रहेकै बेला सोमबार निधन भएको थियो ।

कादर अदनानको मृत्युपछि प्यालेस्टिनी क्षेत्रमा क्रोधको लहर छ । तनाव चुलिएपछि बुधबार बिहान दक्षिणी इजरायलमा चेतावनीस्वरूप साइरन बजाइएको थियो ।