काठमाडौं । नेपाली कांग्रेसका नेता तथा पूर्व गृहमन्त्री बालकृष्ण खाणले नेपालीलाई भुटानी शरणार्थी बनाउने घटनामा आफू संलग्न नभएको दाबी गरेका छन् । साथै उनले आफूसँग जोडेर प्रकाशित समाचारलाई आधारहीन र तथ्यहीन भन्दै चरित्र हत्या नगर्न भनेका छन् ।

नेपालीलाई भुटानी शरणार्थी बनाएर विदेश पठाउने गिरोहमा संलग्नको अभियोगमा त्यसका नाइके, सचिव टेकनारायण पाण्डेलगायतलाई नियन्त्रणमा लिएर अनुसन्धान अघि बढ्दै जाँदा खाणसमेत यसमा संलग्न भएका विवरण बाहिर आइरहेका छन् । त्यसकै आधारमा कतिपय सञ्चारमाध्यमले खाणसमेत संलग्न रहेको भनेर समाचार प्रकाशित गरेपछि खाणको यस्तो प्रतिक्रिया आएको हो ।

‘आधारहीन, तथ्यहीन र संलग्न हुँदै नभएका घटनामा संलग्न भयो भन्दै र जाँदै नगएका स्थानमा भ्रमणमा गएको भन्ने समाचारले अन्योल उत्पन्न हुने र व्यक्तिगत चरित्रहत्या हुने हुँदा यस्ता समाचार सम्प्रेषित नगरिदिनुहुन अनुरोध छ,’ खाणले संक्षिप्त ध्यानाकर्षण पत्रमा भनेका छन् ।