काठमाडौं । थाइल्याण्डमा सम्पन्न आमनिर्वाचनको प्रारम्भिक मतगणनामा विपक्षी दलले अग्रता लिएका छन् । नतिजाबाट मतदाताले सेनाको समर्थनमा रहेको सरकारविरुद्ध मतदान गरेको देखिएको छ ।

जारी मतगणनामा विपक्षी दलहरू मुभ फर्वार्ड र फिउ थार्इले प्रधानमन्त्री प्रयुत चान–ओचाको पार्टीलाई पछि पार्दै लिड गरिरहेको बिबिसीले जनाएको छ ।

नतिजाको प्रारम्भिक रुझानपछि दुवै विपक्षी दल गठबन्धनका लागि वार्ताको तयारीमा रहेको देखिन्छ ।

थाइल्याण्डमा यो निर्वाचनलाई देशको राजनीतिको ‘टर्निङ प्वाइन्ट’ भनिएको छ ।

हालैका वर्षहरूमा देशमा सैन्य विद्रोहहरू देखिएका छन्। सन् २०१४ मा प्रधानमन्त्री आफैंले सैनिक विद्रोहको नेतृत्व गरेका थिए ।

तर अहिले उनलाई मुभ फर्वार्ड र फिउ थाइजस्ता पार्टीले कडा चुनौती दिएका छन् ।

दुवै दलले सैनिक शासनको विरोध गर्दै आएका छन् । फेउ थाईकोको नेतृत्व पातोङटार्न शिनाबात्राले गरिरहेकी छिन् । उनी पूर्वप्रधानमन्त्री थाक्सिन शिनाबात्राकी छोरी हुन् ।