काठमाडौं । प्रतिनिधिसभाका सभामुख देवराज घिमिरेले नक्कली भुटानी शरणार्थी प्रकरणमा पूर्वउप्रधानमन्त्री एवं एमाले सांसद टोपबहादुर रायमाझी पक्राउ परेको संसदलाई जानकारी गराएका छन् ।

सोमबार प्रतिनिधिसभाको बैठकमा सभामुख घिमिरले रायमाझी पक्राउ परेको सूचना पढेर सुनाएका थिए ।

ठगी तथा संगठित अपराधसम्बन्धी मुद्दामा अनुसन्धानको क्रममा रायमाझीलाई मिति २०८०/१/३१ गते राति अन्दाजी ८ः २५ बजेको समयमा प्रहरीले पक्राउ गरेको जानकारी गराएका थिए । घिमिरेले जिल्ला काठमाडौं बूढानीलकण्ठ नगरपालिका ४ बाट पक्राउ गरी जिल्ला प्रहरी परिसर टेकुको हिरासतमा राखिएको व्यहोरा नेपालको संविधानको धारा १०३ को उपधारा ६ बमोजिम जिल्ला प्रहरी परिसर टेकुको पत्रबाट सूचना प्राप्त भएकोसमेत जानकारी गराए ।

रायमाझीलाई जिल्ला अदालत काठमाडौंले तीन दिन हिरासतमा राख्न प्रहरीलाई अनुमति दिएको छ । अदालतले पुर्पक्षका लागि जेल चलान गर्ने आदेश दिएमा उनको पद स्वतः निलम्बित हुनेछ ।