काठमाडौं । नेपाल समाजवादी पार्टीका डा. बाबुराम भट्टराईले देशको अर्थतन्त्र ऋणको पासोमा परिसकेको प्रष्ट संकेत देखिसकेको बताएका छन् । जेठ २५ र २६ गते काठमाडौंमा बसेको पार्टीको केन्द्रीय समितिको तेस्रो पूर्ण बैठकपछि अध्यक्ष भट्टराईले जारी गरेको विज्ञप्तिमा सो कुरा बताएका हुन् ।

सरकारले आगमी आर्थिक वर्ष २०८०/०८१ का लागि ल्याएको वार्षिक बजेले अर्थतन्त्रको धरातलीय यथार्थ एव संरचनागत समस्याहरूलाई नजरअन्दाज गरेको विज्ञप्तिमा उल्लेख छ । केही सामान्य प्रशाशनिक र नीतिगत सुधारका कुरा उठाएपनि बजेट विगतकै निरन्तरता रहेको पार्टीले धारणा राखेको छ । ‘पुँजीगत खर्चको अंश भन्दा वित्तीय व्यवस्थापन अर्थात ऋणको साँवा, ब्याजको भार बढी हुने देखिएको छ । यसले हाम्रो कमजोर अर्थतन्त्र ऋणपासो (Debt Trap) मा परिसकेको प्रष्ट संकेत गरेको छ,’ जारी विज्ञप्तिमा उल्लेख छ ।

अर्थतन्त्रका विद्यमान संरचनागत समस्याहरू हल गर्न र वर्तमान अवस्थामा मूलुकको संकटग्रस्त आर्थिक क्षेत्र खासगरी व्याप्त आर्थिक मन्दी, बैंकिङ प्रणालीमा रहेको उच्च ब्याजदर, तरलता अभाव र साना उद्यमी व्यवसायीहरूले झेल्नुपरेका समस्याहरूमा बैठकले ध्यानाकर्षण गरेको जनाएको छ ।