काठमाडौं । भन्सार विभागले त्रिभुवन अन्तर्राष्ट्रिय विमानस्थलको जाँचपासमा खटिएका कर्मचारीलाई तत्काल निलम्बन गरेर विस्तृत अनुसन्धान गर्ने निर्णय गरेको छ ।

आज विहान बसेको विभागको बैठकले अनुसन्धानका लागि निर्देशकको संयोजकत्वमा छानविन समिति गठन गर्ने निर्णय भएको विभागका सूचना अधिकारी पुण्य विक्रम खड्काले जानकारी दिए ।

योसँगै विमानस्थलस्थित कार्गो बिल्डिङको जाँचपासमा खटिएका कर्मचारीको नाम मगाएर आजै निलम्बन गरिने उनले बताए । उनका अनुसार कर्मचारीको नामवालीसँगै अन्य विस्तृत विवरण पनि विमानस्थलसँग माग गरिएको छ ।

मंगलबार साँझ विमानस्थलको भन्सार कार्यालयबाटै पास भइसकेको करिब एक सय किलो सुन राजश्व अनुसन्धान विभागले बरामद गरेको थियो ।