काठमाडौं । राष्ट्रिय स्वतन्त्र पार्टीका सांसद गणेश पराजुलीले उम्मेदवारी फिर्ता लिएपछि जनमत पार्टीका अब्दुल खान प्रतिनिधिसभाको उद्योग तथा वाणिज्य र श्रम तथा उपभोक्ता हित समितिको सभापतिमा सर्वसम्मत निर्वाचित भएका छन् ।

सत्तारुढ गठबन्धन र प्रमुख प्रतिपक्षी दल नेकपा एमालेबीच संसदीय समितिको सभापति पद बाँडफाँट हुँदा यो समिति जनमतको भागमा परेको थियो । भागबण्डामा रास्वपालाई समेटिएको थिएन ।

आइतबार मनोनयन दर्ताको समय तोकिएकोमा रास्वपाका पराजुलीले भने उम्मेदवारी दर्ता गराएका थिए । अन्य ९ वटा समितिमा सर्वसम्मत भएपनि यो समितिमा निर्वाचन गर्नु पर्ने थियो ।