काठमाडौं । अर्थमन्त्री डा. प्रकाशशरण महतले नेपालको आर्थिक सूचक सकारात्मक भएर गएको दाबी गरेका छन् ।

बुधबार मन्त्रालयमा मुलुकको पछिल्लो आर्थिक अवस्थाबारे जानकारी दिन आयोजित पत्रकार सम्मेलनमा उनले यस्तो दाबी गरेका हुन् ।

मौद्रिक नीति समीक्षामार्फत अर्थतन्त्रलाई ट्रयाकमा ल्याउन सहयोग मिलेको बताएका छन् । उनले भने, ‘समग्रमा आर्थिक सूचक सकारात्मक भएर गएको छ । तर, परिणाम देखिन केही समय लाग्छ । अर्थतन्त्र सकारात्मक दिशातर्फ उन्मुख छ, मौद्रिक नीति समीक्षापछि सेयर बजार पनि सकारात्मक छ । जग्गा कारोबार पनि बढ्दै छ ।’

लामो प्रयासपछि अर्थतन्त्र सुधारको प्रयास सकारात्मक भएको बताउँदै उनले नेपालको अर्थतन्त्र ठीक छैन र अप्ठ्यारो छ भन्ने अहिले हटेको बताए। नेपालमा भविष्य छैन, अर्थतन्त्र ठीक छैन भन्ने मानसिकतामा पनि केही सुधार भएको उनले बताए ।