मोरङ । मोरङ जहदा गाउँपालिका वडा नम्बर १ का वडाध्यक्ष बाबुराम राजवंशीका १० वर्षीय छोरालाई अपहरण गरेको आरोपमा तीन जना पक्राउ परेका छन् ।

अपहरणको आरोपमा मोरङ प्रहरीले बुधबार जहदा– १ का २० वर्षे अभिषेक यादव, १९ वर्षे मिथिलेशकुमार यादव र विराटनगर–१८ का २१ वर्षे विवेकानन्द यादवलाई पक्राउ गरेको हो ।

मोरङ प्रहरीका प्रवक्ता डिएसपी रन्जनकुमार दाहाललेका अनुसार अपहरणमा परेका १० वर्षीय बालकको सकुशल उद्धार गरिएको छ ।

बुधबार दिउँसो दुई बजेतिर घर नजिकैको चउरमा खेलिरहेका बालकलाई अपहरणकारीले ‘स्कुलमा फोटो खिच्नु छ’ भन्दै साइकलमा राखेर विराटनगरतर्फ लगेका थिए।

अभिषेकको दाजु बस्ने घरमा बालक राख्न खोज्दा विवाद भएको र बालकलाई त्यहाँबाट अन्यत्र लैजाने प्रयास हुँदै गर्दा थाहा पाएर स्थानीयले हो–हल्ला गरेपछि बालको उद्धार गर्दै अपहरणकारीलाई प्रहरीले नियन्त्रणमा लिएको थियो ।

पक्राउ परेका तीनै जना एक हजार पाइने लोभमा परिचालित भएको पाइएको अनुसन्धानमा संलग्न एक अधिकृतले बताए । अपहरण गराउने मुख्य व्यक्तिको खोजी भइरहेको प्रहरीले जनाएको छ ।