काठमाडौं । रेमिट्यान्स मुद्दती खाता वैदेशिक रोजगारीमा रहेका नेपाली कामदार तथा स्वदेशमा बस्ने तिनमा परिवारका सदस्यबाट प्राप्त रेमिट्यान्सलाई लक्षित गरेर सञ्चालनमा ल्याइएको निक्षेप खाता हो ।

यो खाताले रेमिट्यान्सबाट आएको रकम बढाउँनका लागि सुरक्षित अवसर प्रदान गर्छ । यस खातामा सेवाग्राहीले रेमिट्यान्समार्फत विदेशबाट पठाएको रकमलाई निश्चित समायावधिको लागि सुरक्षितसँग जम्मा गर्न सक्छन् । यस्तो खातामा अन्य मुद्दती खाताभन्दा ब्याजदर पनि उच्च मात्रामा पाइन्छ । रेमिट्यान्स खातामा बैंकहरुले विदेशबाट रेमिट्यान्स प्राप्त गर्ने व्यक्तिलाई डेविट कार्ड, क्रेडिट कार्ड, मोबाइल बैंकिङ्ग, डिम्याट खाता, दुर्घटना विमा लगायतका सेवा सुविधा प्रदान गर्छ ।

रेमिट्यान्स खाता खोल्दा के हुन्छ ?

समयावधिमा लचिलोपन

रेमिट्यान्स मुद्दती खातामा बैंकहरुहरुले समयावधि लचिलो बनाएका छन् । प्रायः यस खातामा बैंकहरुले तीन महिनादेखी पाँच वर्षसम्मको कार्यकाल अवधि प्रस्ताव गर्ने गर्छन् । जस अनुसार तपाइ निश्चित समय अवधि छनौट गरी रकम जम्मा गर्न सक्नुहुनेछ ।

सुरक्षित तथा स्थिर लगानी

रेमिट्यान्स खाताले रेमिट्यान्स प्रयोगकर्ताहरुलाई सुरक्षित र स्थिर लगानीको अवसर प्रदान गर्दछ । तपाईले आफ्नो रेमिटबाट प्राप्त भएको रकमलाई मुद्दती खातामा जम्मा गरेर बजारको आर्थिक उतारचढावबाट जोगाउन सक्नुहुन्छ । साथै, निश्चित समयावधिको लागि मुद्दती खातामा जम्मा गरेको साँवा रकमलाई वैदेशिक रोजगारीबाट फर्किएपछि नयाँ सीप सिक्न वा नयाँ व्यवसायमा सञ्चालन गर्न आवश्यक पर्ने लगानीका रुपमा प्रयोग गर्न सकिन्छ ।

उच्च ब्याजदर

नियमित बचत खाताको तुलनामा रेमिट्यान्स मुद्दती खातामा ग्राहकले उच्च ब्याजदर पाउन सक्छन् । यस्तो खाताको ब्याज बैंक अनुसार भिन्न भए पनि बैंकहरुले न्युनतम १० प्रतिशतबाट १२ प्रतिशतसम्मको ब्याज उपलब्ध गराउँदै आएको छ ।

कर्जाको सुविधा

रेमिट्यान्स मुद्दती खातामा उच्च ब्याज पाइनुका साथै कर्जाहरुको पनि व्यवस्था हुन्छ । यो खातामार्फत प्रयोगकर्ताले सवारी कर्जा, आवास कर्जा, शैक्षिक कर्जा तथा व्यक्तिगत कर्जा लिन सक्छन् ।

खाता खोल्दा के चाहिन्छ ?

रेमिट्यान्स मुद्दती खाता खोल्न नागरिकताको प्रमाणपत्र तथा पासपोर्ट, रेमिट्यान्स प्राप्त हुने स्रोतको प्रमाण, श्रम स्वीकृति, पासपोर्ट साइजको फोटो आवश्यक पर्छ । साथै यो खाता खोल्नका लागि छुटै सामान्य बचत खाता वा रेमिट्यान्स बचत खाता अनिवार्य आवश्यक पर्छ । रेमिट्यान्स मुद्दती खाता नजिकैको बैंक शाखामा गएर खोल्न सकिन्छ । (यो सामग्री हामीले सरल बैंकिङको सहयोगमा तयार पारेका हाैँ)