काठमाडौं । सरकारी थिंक ट्यांक नीति अनुसन्धान प्रतिष्ठान र नेपालवाच मल्टिमिडिया प्रा.लिबीचको सहकार्य दोस्रो वर्षमा प्रवेश गरेको छ ।

नेपालवाचको नियमित टेलिभिजन प्रस्तुति पोलिसी डायलगलाई थप बलियो र प्रभावकारी बनाउने सर्तसहित सहकार्यलाई निरन्तरता दिने निर्णय भएको हो । यो कार्यक्रम हरेक आइतबार राति ८ बजे एपिवान टेलिभिजन र नेपालवाचको युट्युबमा प्रशारण हुँदै आइरहेको छ ।

समझदारीपत्रमा प्रतिष्ठानकोतर्फबाट कार्यालय प्रबन्धक लक्ष्मण भट्टराई र नेपालवाचको तर्फबाट अध्यक्ष पुष्प ढुंगानाले हस्ताक्षर गरेका छन् । अघिल्लो वर्षको सहकार्यको समीक्षा र पोलिसी डायलगलाई थप व्यवस्थित र प्रभावकारी बनाउनका लागि सम्झौता भएको छ ।

पोलिसी डायलगको छलफलका क्रममा उठेका विषयहरुलाई समेटेर पुस्तक प्रकाशन गर्ने विषयमा पनि दुई संस्थाबीच समझदारी भएको छ । योसँगै सरकारी तथा गैरसरकारी संस्थाहरुसँग साझेदारी गर्दै पोलिसी डायलगलाई थप व्यवस्थित गर्न पनि समझदारी भएको छ ।

नीतिगत विषयमा प्राज्ञिक बहससँगै पैरवी गर्नु दुवै संस्थाको साझा उद्देश्य हो । आगामी दिनमा विविध विषयमा विज्ञहरूसँगको छलफल र बहसलाई थप प्रोत्साहन गरिनेछ ।

टेलिभिजन कार्यक्रम पोलिसी डायलगमा अब नेपालवाच र नीति अनुसन्धान प्रतिष्ठान सँगसँगै