काठमाडाैं । पछिल्लो समय सेयर बजारमा लगानी गर्नेहरुको संख्या बढ्दो छ । जतिपनि लगानीकर्ताहरु बजारमा प्रवेश गर्छन्, उनीहरूले बुझेर भन्दा पनि प्रभावमा परेर लगानी गरेको पाइएको छ । बजार नबुझीकनै लगानी गर्दा धेरैले राम्रो प्रतिफल प्राप्त गर्नुको सट्टा उल्टै आफ्नो लगानी डुबाएका थुप्रै उदाहरणहरु छन् ।

पुँजीबजारका विश्लेषकहरुसमेत सेयरमा बुझेर मात्रै कारोबार गर्न सुझाव दिन्छन् । वास्तवमै सही स्टक छनौट गर्न सकियो भनेमात्रै दिर्घाकालिन रुपमा लगानीकर्ताले सही प्रतिफल प्राप्त गर्न सक्छन् । यदि तपाई पहिलो पटक सेयर बजारमा लगानी गर्दै हुनुहन्छ भने तपाईंका लागि यो टिप्स महत्वपूर्ण हुन सक्छ ।

लगानीको लक्ष्य निर्धारण गर्नुहोस्
सेयरमा लगानी गर्नुभन्दा अगाडि तपाईँले स्पष्ट रूपमा आफ्नो लगानीको उद्देश्य निर्धारण गर्नुहोस् । चाहे तपाईं दीर्घकालीन लक्ष्यसहित लगानी गर्न खोज्दै हुनुहुन्छ या नियमित आम्दानी गर्नका लागि । सर्वप्रथम यसमा स्पष्ट हुनुहोस् । यसले तपाईँलाई सही स्टक छनौटको लागि मद्दत गर्न सक्छ ।

जोखिम विश्लेषण
लचिलो पोर्टफोलियो सिर्जना गर्न, तपाईंको जोखिम सहिष्णुता मूल्याङ्कन गर्नु महत्वपूर्ण हुन्छ । यसका लागि बजारको उतार चढावसँग आफ्नो वित्तीय स्थिति तुलना गर्नुहोस् र विचार पुर्याउनुहोस् । ख्याल गर्नैपर्ने कुरा के हो भने, उच्च जोखिम स्टकहरूमा तपाईले जति छिटो नाफा कमाउन सक्नुहुन्छ उत्तिकै घाटा पनि बेहोर्नुपर्ने हुनसक्छ ।

अनुसन्धान गर्नुहोस्
धेरै लगानीकर्ताहरु बजारमा नबुझीकनै प्रवेश गर्ने गरेको पाइन्छ । अनुसन्धानबिना पुँजी बजारमा लगानी गर्नु जोखिमपूर्ण हुन्छ । लगानी गर्नुभन्दा अघि सम्भावित कम्पनीहरूको वित्तीय स्थिति, तिनीहरूको व्यापार मोडेलबारे पर्याप्त विश्लेषण, अध्ययन गरेर मात्रै लगानीको निर्णय गर्नुहोस् ।

आधारभूत विश्लेषण गर्नुहोस्

स्टकको आन्तरिक मूल्य जान्नको लागि तपाईंले यसको आधारभूत विश्लेषण गर्नुपर्छ । लगानी गर्दा सधैं अरुको सुझावमा मात्रै निर्भर नहुनुहोस् । वित्तीय विवरण, अनुपातहरू, आय रिपोर्टहरू र कम्पनी वृद्धिको सम्भावनाबारे जाँच गर्नुहोस् । यसबाहेक, निश्चित रूपमा प्राविधिक विश्लेषण पनि गर्न सिक्नुहोस्।

धेरै थरीको पोर्टफोलियो

फरक फरक कम्पनीको पोर्टफोलियोले तपाईंको लगानीको जोखिमलाई धेरै कम गर्छ । जोखिम व्यवस्थापनको लागि यो रणनीति पनि हो । थरी थरीका कम्पनीको पोर्टफोलियोले तपाईंको समग्र लगानीमा खराब प्रदर्शन गर्ने स्टकहरूको प्रभावलाई कम गर्न मद्दत पुर्याउँछ ।

लाभांशमा फोकस गर्नुहोस्

लाभांश भुक्तानी गर्ने स्टकहरूले स्थिर आय स्ट्रिम प्रदान गर्न सक्छ । यस्ता कम्पनीहरुमाथि लगानीकर्ताहरुको आकर्षण बढेको हुन्छ । यस्तो स्टक छनौट गर्दा, लाभांश इतिहास र कम्पनीको स्थिरताबारे विचार गर्नुहोस् ।