काठमाडौं । प्रमुख प्रतिपक्षी दल नेपाली कांग्रेस संघीय संसदको संयुक्त बैठकमा सरकारको नीति तथा कार्यक्रम प्रस्तुत गर्न दिन सहमत भएको छ ।

मंगलबार सिंहदरबारमा सुरु कांग्रेस संसदीय दलको बैठकले राष्ट्रपति रामचन्द्र पौडेललाई नीति तथा कार्यक्रम प्रस्तुत गर्न दिने सहमति गरेको हो ।

कांग्रेसका एक नेताले सिंहदरबारमा अहिले चलिरहेको बैठकमा राष्ट्रपतिलाई नीति तथा कार्यक्रम प्रस्तुत गर्न दिने मोटामोटी सहमति बनेको जानकारी दिए ।

नीति तथा कार्यक्रम प्रस्तुत गर्न दिए पनि संसदमा यसमाथिको छलफललाई भने अघि बढ्न नदिने रणनीति कांग्रेसले तय गरेको छ ।

सहकारी ठगी प्रकरणमा उपप्रधान तथा गृहमन्त्री रवि लामिछाने संलग्न रहेकाले यसमाथि संसदीय छानबिन समिति गठन हुनुपर्ने माग राखेर कांग्रेसले संसद् अवरोध गरेपछि मंगलबारको नीति तथा कार्यक्रमको प्रस्तुति के हुने भन्ने अन्योल सिर्जना भएको थियो । कांग्रेसले नीति तथा कार्यक्रम प्रस्तुत गर्न दिएर यससम्बन्धी छलफलमा अवरोध गर्ने निर्णय गरेसँगै सरकारलाई भने तत्कालका लागि राहत मिलेको छ ।