काठमाडाैं । श्रम रोजगार तथा सामाजिक सुरक्षा मन्त्रालयले वैदेशिक रोजगारबाट फर्किएर नेपालमा उद्यम गर्ने ८ जना उद्यमीहरूलाई सम्मान गरेको छ । आइतबार  मन्त्रालयमा एक कार्यक्रमको आयोजना गरेर वैदेशिक रोजगारीबाट  स्वदेश फर्केर नेपालमै केही उद्यम गरेका ८ जना उद्यमीहरूलाई उद्यमी राष्ट्र पुरस्कार र उत्कृष्ट उद्यमी राष्ट्र पुरस्कारले सम्मान गरेको हो ।

मन्त्रालयले ७ जना उद्यमीलाई  ७५ हजार रूपैयाँ बराबरको पुरूस्कार र एक जनालाई १ लाख ५० हजार बराबरको उत्कृष्ट उद्यमी राष्ट्र पुरस्कारले सम्मानित गरेको छ ।

पुरूस्कारबाट सम्मानित हुनेहरूमा चन्द्रप्रसाद बस्नेत, रविलाल पन्थ, मोहनप्रसाद संग्रौला, टक्क बहादुर नेपाली, चन्द्र सिंह थापा, भुपेन्द्र शर्मा हुन् । उद्यमीहरूमध्ये चन्द्रप्रसाद बस्नेत उत्कृष्ट उद्यमी राष्ट्र पुरूस्कारबाट सम्मानित भएका छन् ।

पुरूस्कार कार्यविधिको दफा ६ बमोजिम न्युनतम सर्त पुरा भएका ५५ वटा आवेदकहरूको निर्धारित सूचकहरूको मूल्यांकन गरी योग्यताक्रममा निरीक्षण रोजगार सेवा केन्द्रका रोजगार संयोजकहरूबाट गराइएको श्रम मन्त्रालयले जनाएको छ ।