काठमाडौं । नेपाल प्रहरीका डिआइजी यज्ञविनोद पोखरेलमाथि विस्तृत छानविन अघि बढेको छ ।

मधेस प्रदेश प्रहरी प्रमुखका रूपमा कार्यरत छँदा खातामा स्रोत नखुलेको रकम कारोबार गरेको खुलेपछि उनी छानबिनमा तानिएका हुन् ।

प्रहरी प्रधान कार्यालयले अहिले उनीमाथि विस्तृत छानबिन गरिरहेको छ । उनका १० जना घुमुवामाथि पनि प्रधान कार्यालयले सोधपुछ गरिरहेको छ ।

यसैबीच, उनको खातामा पैसा हाल्ने जनकपुरका जितेन्द्र कर्ण पक्राउ परेका छन् ।

केही दिनअघि प्रहरी महानिरीक्षक बसन्तबहादुर कुँवर आफैंले डिआइजी पोखरेलमाथि कारबाही हुन लागेको खुलासा गरेका थिए । जिल्ला प्रहरी कार्यालय, रुपन्देहीको भवन उद्घाटन कार्यक्रममा बोल्दै उनले एक डिआइजीको खातामा पैसा भेटिएकाले उनी छिट्टै फस्ने लागेको भन्दै सजग हुन निर्देशन दिएका थिए।