काठमाडौं । इन्डोनेसियामा बुधबार शक्तिशाली भूकम्प गएको छ । त्यहाँको सुलावेसी टापु तट केन्द्रबिन्दु भएर ६.१ रेक्टर स्केलको भूकम्प गएको हो ।

युनाइटेड स्टेट जियोलोजिकल सर्वे (युएसजिएस) ले बुधवार बिहान इन्डोनेसियाको सुलावेसी टापुको तट केन्द्रबिन्दु भएर ६.१ तीव्रताको भूकम्प गएको जनाएको छ । युएसजीका अनुसार भूकम्पको केन्द्र सुलावेसी प्रान्त नजिक १० किलोमिटरको गहिराइमा थियो।

भूकम्पबाट भएको जनधनको क्षतिको विवरण हालसम्म नआएको बिबिसीले जनाएको छ ।

इन्डोनेसिया ‘रिङ अफ फायर’ क्षेत्रमा अवस्थित छ, जहाँ टेक्टोनिक प्लेटहरूको गतिविधिको कारण भूकम्प आइरहन्छ।

यसअघि जनवरी २०२१ मा पनि सुलावेसीमा ६.२ तीव्रताको भूकम्प आउँदा १०० भन्दा बढी मानिसको मृत्यु भएको थियो भने हजारौं घरबारविहीन भएका थिए।

२०१८ मा सुलावेसीको पालूमा गएको ७.५ रेक्टर स्केलको भूकम्पपछि आएको सुनामीले २ हजार २०० भन्दा बढी मानिसको ज्यान लिएको थियो।

२००४ मा त्यहाँको आचे प्रान्तमा ९.१ रेक्टर स्केलको अति शक्तिशाली भूकम्प गएको थियो । जसले जसले सुनामी ल्याउँदा त्यहाँ १ लाख ७० हजारभन्दा बढी मानिस मारिएका थिए।