काठमाडौं । जग्गासम्बन्धी विवादमा छिमेकीको हत्या गरी नक्कली साधु बनेका पर्साको विन्दवासिनी गाउँपालिका २ का ६२ वर्षीय लोकनाथ साह तेली १७ वर्षपछि पक्राउ परेका छन् ।

छिमेकी ढोडा मुखिया विनको ०६४ वैशाख २५ गते गोली प्रहारबाट हत्या गरी फरार भएका उनी भारतको चम्पारण पिरियास्थित रामजानकी मन्दिरमा विगत १० वर्षदेखि साधुको भेषधारणा गरी लुकिछिपी बस्दै आइरहेका थिए ।

हत्यापश्चात फरार लोकनाथलाई कर्तव्य ज्यानसम्बन्धी मुद्दामा सर्वोच्च अदालतले ०६९ कात्तिक २४ गते सर्वस्वसहित जन्मकैद ठहर गरेको थियो । उनलाई नेपाल आएको मौका पारी केन्द्रीय अनुसन्धान ब्युरोको टोलीले सोमबार पर्साको वीरगन्जबाट पक्राउ गरेको हो ।

फैसला कार्यान्वयनका लागि उनलाई आजै जिल्ला अदालत, पर्सामा पेश गरिएको ब्युरोका प्रहरी उपरीक्षक सुधीरराज शाहीले जानकारी दिए ।