काठमाडौँ । संघीय निजामती विधेयकमा समावेश कुलिङ पिरियडको व्यवस्थाबारे सांसदहरूले प्रतिनिधिसभा सभामुखसँग छलफल गरिरहेका छन्।

सिंहदरवारस्थित सभामुख देवराज घिमिरेको कार्यकक्षमा सांसदहरूले यो विषयमा छलफल गरेका हुन्। छलफलमा राज्य व्यवस्था तथा सुशासन समितिका सभापति रामहरि खतिवडा, नेकपा (एकीकृत समाजवादी) का राजेन्द्र पाण्डे, नेपाली कांग्रेसकी ईश्वरीदेवी न्यौपाने, नेकपा (एमाले) का कृष्णगोपाल श्रेष्ठ, जनता समाजवादी पार्टी नेपालका प्रकाश अधिकारीलगायत सहभागी छन्।

प्रतिनिधिसभाबाट पारित संघीय निजामती विधेयकमा कुलिङ पिरियडको व्यवस्थामा प्रयोग भएको शब्दावलीले विवाद निम्त्याएको छ। दुई वर्षको सहमति भए पनि विधेयक पारित हुँदा ‘बाहेक’ शब्द समावेश भएपछि उत्पन्न विवादका विषयमा सांसदहरूले सभामुखसँग छलफल गरेका हुन्।