काठमाडौँ । नवलपरासीमा रहेका ५ स्थानीय तहमा आज शोक बिदा दिइएको छ । सोमबार जेन जेडको प्रदर्शनका क्रममा मृत्यु भएकाहरूको शोकमा स्थानीय तहले सूचना निकालेर बिदा दिएको हो ।

बिदा दिनेमा रामग्राम नगरपालिका, बर्दघाट नगरपालिका, पाल्हीनन्दन, सरावल र प्रतापपुर गाउँपालिकाले शोक बिदा दिएको हो । स्थानीय तहले दिएको बिदामा पालिकाभित्रका शैक्षिक संस्था, वडा कार्यालय र त्यहाँ रहेका सबै सेवा बन्द हुने जनाएको छ ।

पालिकाहरूले निकालेको शोक बिदामा जेन जेड पुस्ताले गरेको शान्तिपूर्ण प्रदर्शनका क्रममा अप्रत्यासी र अकल्पनीय रूपमा ठूलो संख्यामा युवा नागरिकको निधन भएको घटनाले स्तब्ध बनाएको उल्लेख छ । वर्तमान विषम परिस्थितिलाई ध्यानमा राखेर शान्ति र संयमपूर्वक समस्याको निकास निकाल्न पनि शोक विज्ञप्तिमार्फत नेपाल सरकारसँग आग्रह गरिएको छ ।

जेन जेडहरुको प्रदर्शनका क्रममा काठमाडौँमा १७ र इटहरीमा २ गरी १९ जनाको मृत्यु भएको छ । ३ सय बढी घाइते भएका छन् ।