काठमाडौं । जनजीहरूले मंगलबार बिहानैदेखि प्रदर्शन सुरु गरेका छन् ।

सरकारले आफूविरुद्धको प्रदर्शन रोक्न काठमाडौं, ललितपुर, भक्तपुरमा मंगलबार बिहानैदेखि कर्फ्यु आदेश जारी गरे पनि जेनजी समूहले प्रदर्शन यथावत् राखेका हुन् ।

जेनजीहरूले बिहानैदेखि वानेश्वर क्षेत्रमा प्रदर्शन गरिरहेका छन् । सोमबारको प्रदर्शनमा सरकारले गरेको दमनको विरोध गर्दै उनीहरूले प्रधानमन्त्रीको राजीनामा माग गरिरहेका छन् ।

त्यस्तै, काठमाडौंको कलंकीमा पनि टायर बालेर बिहानैदेखि प्रदर्शन सुरु भएको छ ।

यसक्रममा त्यहाँ केहीबेर प्रदर्शनकारी र प्रहरीबीच तनावसमेत भएको थियो । लाठी प्रहार गरेर प्रहरीले आन्दोलनकारीलाई तितरबितर पारेपछि अवस्था केही सामान्य बनेको छ ।

ललितपुरको चापागाउँमा पनि जेनजी समूहले सरकारको रवैयाविरुद्ध मंगलबार बिहानैदेखि प्रदर्शन गरिरहेका छन् ।

बन्द गरिएको सामाजिक सञ्जाल खुलाउनु पर्ने, सुशासन कायम गर्नुपर्ने लगायत माग राखेर जेनजीले मंगलबार राजधानी काठमाडौंसहित देशका विभिन्न मागमा प्रदर्शन गरेका थिए । यसक्रममा प्रहरीले गोली चलाउँदा काठमाडौंमा १७ र बाहिर २ जना गरी कुल १९ जनाको मृत्यु भइसकेको छ । घटनामा सयौंको संख्यामा प्रदर्शनकारी घाइते भएका छन् ।

जेनजीहरूले जायज माग राखेर गरेको प्रदर्शनमा सरकारले बर्बर दमन गरेपछि यसको राष्ट्रिय तथा अन्तर्राष्ट्रिय रूपमा चर्को आलोचना भएको छ । प्रधानमन्त्री केपी शर्मा ओलीले पदबाट राजीनामा दिनुपर्ने आवाज उठिरहे पनि अहिलेसम्म गृहमन्त्री रमेश लेखकले मात्र राजीनामा बुझाएका छन् ।