काठमाडौं । ठूलो पानी पर्ने प्रणाली बागमती प्रदेशबाट कोशी प्रदेशतिर सरेको छ । योसँगै शुक्रबारदेखिको अविरल वर्षा रोकिएको छ ।

मौसम पूर्वानुमान महाशाखाले ठूलो पानी पार्ने प्रणाली शनिबार बागमती प्रदेशमा सक्रिय बने पनि त्यो कोशी प्रदेशतिर सरेको जनाएको छ । उक्त प्रणाली कोशीतिर सरेकाले काठमाडौं उपत्यका र आसपासका जिल्लाहरूमा ठूलो पानी पर्ने सम्भावना टरेको छ ।

बागमती, मधेश, गण्डकी लगायत प्रदेशमा शुक्रबारदेखि अविरल वर्षा हुँदा सडक आवागमन प्रभावित हुन पुगेको छ । सरकारले बेलैमा सतर्कता र सावधानी अपनाएकाले यस पटक मानवीय क्षति हुनबाट रोकिएको छ ।

बागमती प्रदेशलगायत क्षेत्रमा वर्षा रोकिएर आइतबार बिहान घाम लागे पनि पानी पर्ने सम्भावना अझै कायम रहेको मौसम पूर्वानुमान महाशाखाको भनाइ छ । मधेस प्रदेशमा ठूलो पानीको जोखिम नरहे पनि आकाशमा बादल रहेकाले सानो पानीको जोखिम छ ।

पानी पार्ने प्रणाली कोशीतर्फ सरेकाले उक्त प्रदेशको पाँचथर, इलाम, झापादेखि चतरासम्मको तराईका भूभागका धेरै स्थानमा भारीदेखि धेरै भारी वर्षा भएको छ । आज पनि कुनै–कुनै ठाउँमा भारी वर्षाको सम्भावना रहेको र दिउँसोदेखि त्यो कमजोर हुँदै जाने मौसम पूर्वानुमान महाशाखाले जनाएको छ । भारी वर्षाको खतरा रहेकाले आवश्यक सतर्कता अपनाउन मौसम पूर्वानुमान महाशाखाले सबैमा अनुरोध गरेको छ ।