काठमाडौँ । नेकपा एमालेका अध्यक्ष केपी शर्मा ओलीले सरकारले फागुन २१ गते निर्वाचन गर्ने तयारी कतै नदेखिएको बताएका छन्।

एमालेको ११औँ महाधिवेशनको उद्घाटन सत्रलाई सम्बोधन गर्दै अध्यक्ष ओलीले नेताहरूलाई निषेधाज्ञा गरेर निर्वाचन हुन नसक्ने बताएका हुन् ।

उनले भदौ २३ र २४ गते जेन जेड आन्दोलनको नाममा सरकार परिवर्तन गरिएको र नेपाली एकतामा ठूलो खलल पुर्‍याएको आरोप लगाए। ‘जेन जेड आन्दोलनको नाममा सरकार परिवर्तन मात्र गरिएको थिएन। नेपाली एकतालाई खलल पार्ने ठूलो दुर्घटना घटाइएको थियो। देशलाई उल्टो दिशामा लगिएको थियो,’ उनले भने।

संविधान विपरीत सरकार गठन गरेको आरोप लगाउँदै अध्यक्ष ओलीले एमालेले प्रतिनिधिसभा पुनर्स्थापना चाहेको बताए।

उनले भने ‘प्रतिनिधिसभा तुरुन्त पुनर्स्थापना होस्। देश लोकतन्त्रको बाटोमा हिँडोस्। सरकारले फागुन २१ चुनाव गराउँदै छ भन्छ, तर चुनावको तयारी कतै देखिँदैन। संवादको सट्टा घृणा, मिडिया ट्रायल र षड्यन्त्र भइरहेको छ। बहसको सट्टा नेताहरूलाई मुद्दा, निषेधाज्ञा, स्थान हद र पासपोर्ट रद्द गरिएको छ।’ उनले चुनावको नाममा देशलाई अलमल्याउने काम भइरहेको बताए।