धनुषा । नापजाँच सम्पन्न भएको करिब ११ वर्षपछि धनुषाको मिथिला नगरपालिका–४ का ११० परिवारले जग्गाधनी पुर्जा पाएका छन् ।

साविक कजरारमौल गाउँ विकास समितिअन्तर्गत पर्ने गाउँ ब्लक (स्ववासी) जग्गाको नापजाँच आर्थिक वर्ष २०७१/७२ मा सम्पन्न भएको थियो । नापजाँच सकिए पनि जग्गा दर्ताका लागि आवश्यक जनसहभागिता न्यून हुँदा पुर्जा वितरण प्रक्रिया लामो समयदेखि रोकिएको थियो ।

नापी कार्यालय धनुषाका अनुसार आयोगबाट नापनक्सा भइसकेका जग्गाको आवश्यक प्रक्रिया पूरा गरी ११० थान जग्गाधनी पुर्जा वितरण गरिएको हो ।

लामो समयदेखि पुर्जाविहीन रहेका स्थानीयले जग्गाधनी पुर्जा पाएसँगै आफ्नो जग्गाको कानुनी स्वामित्व सुनिश्चित भएको बताएका छन् ।