काठमाडौं । नेपालभरका उत्कृष्ट सात  नगरपालिका घोषणा भएका छन् । नगरपालिका संघले नगरपालिकाको कामको मूल्यांकन गर्दै विभिन्न विधाका सात उत्कृष्ट नगरपालिका छानेको हो । संघको २९ वार्षिक साधारण सभाबाट सात उत्कृष्ट नगरपालिकालाई सम्मान गरिएको छ । प्रधानमन्त्री शेरबहादुर देउवाले उत्कृष्ट बनेका नगरपालिकालाई सम्मान गरेका छन् ।

संस्थागत विकासतर्फ उत्कृष्ट हुनेमा स्याङजाको वालिङ र पुतलीबजार नगरपालिका छन् ।

सहरी योजना र विपद् व्यवस्थापनको उत्कृष्टमा धादिङको नीलकण्ठ नगरपालिका परेको छ ।

स्थानीय आर्थिक विकासमा सर्लाहीको हरिवन नगरपालिका उत्कृष्ट बनेको छ ।

वातावरण तथा उत्थानशीलतामा इलामको इलाम नगरपालिका उत्कृष्ट भएको छ । सामाजिक विकासतर्फ उत्कृष्ट बन्नेमा रुपन्देहीको तिलोत्तमा र चितवनको राप्ती नगरपालिका परेका छन् ।

कार्यक्रममा प्रधानमन्त्री शेरबहादुर देउवाले स्थानीय सबैभन्दा नजिकको सरकार भएको पनि बताए । स्थानीय तहलाई स्थानीय सरकार भन्न पनि कुनै आपत्ति नहुने उनको भनाई थियो ।