दिल्ली पुगेपछि सचिवलाई निगमको फुटाइएको ब्यागेज उपहार !

नेपालवाच २०७९ चैत ७ गते १३:०२

काठमाडौं । राष्ट्रिय ध्वजावाहक नेपाल वायुसेवा निगमको ग्राउण्ड ह्यान्डलिङ सेवा कस्तो छ ? भनिरहनै पर्दैन । गन्तव्यमा पुग्नेबेलासम्म यात्रुले ब्यागेज नै फुटिसकेको अवस्थामा पाउने अवस्था पुरानो होइन ।

त्यसो त सामान धेरै चोरी हुन थालेपछि निगममा ग्राउण्ड ह्याण्डलिङ गर्ने कर्मचारीलाई गोजी नभएको ‘ड्रेस’ लगाउनसमेत उच्च सुरक्षा संयन्त्रले सुझाव दिएको थियो ।

यसपटक भने एउटा सरकारी निकायको यस्तो कुकर्मको चपेटामा नेपाल सरकारका सचिव फन्दामा परेका छन् । निर्वाचन आयोगका सचिव गोकर्णमणि दुवाडीले नेपाल एयरलाइन्सको जाहाजमा दिल्ली पुगेपछि आफ्नो ब्यागेज लथालिङ्ग पारेर फुटाइएको अवस्थामा पाएपछि ट्वीटरमा आक्रोश व्यक्त गरेका छन् ।

दुवाडीले यसको जिम्मा कसले लिने भन्दै निगम र नियामक निकायलाई ट्वीटमार्फत प्रश्न गरेका छन् ।

उनले आफ्नो ट्वीटर ह्याण्डलमा ट्वीट गरेका छन्, ‘नेपाल एयरलाइन्सबाट दिल्ली पुगेपछि पहिलो उपहार लथालिङ्ग पारिएको फुटाएको ब्यागेज हात पर्यो । यसको जिम्मा कसले लिने ? तिम्रो अनुसन्धान गर्दै गरौला । मैले मेरो सामान बोक्न अब डोको खोज्नु पर्यो ?’

नेपाल एयरलाइन्स, नागरिक उड्डसन प्राधिकरणको आधिकारिक ट्वीटर ह्याण्डललाईसमेत ट्याग गर्दै उनले प्रश्न गरेका छन्।