काठमाडौं। कांग्रेसका सांसद धनराज गुरुङले रास्वपाका सांसद डा. ढाकाकुमार श्रेष्ठ र मेडिकल व्यवसायी दुर्गा प्रसाईंबीच भएको अडियो प्रकरण सम्बन्धमा छानविनका लागि संसदीय समिति गठन गर्न माग गरेका छन् ।

सोमबार प्रतिनिधिसभाको बैठकमा बोल्दै उनले मन्त्री बन्नकै लागि एउटा व्यवसायीसँग रकम माग्नु लाजमर्दो विषय के हुन सक्छ भन्दै प्रश्न गरे ।

‘मन्त्री बन्‍नकै लागि कुनै एउटा व्यवसायीसँग बडो पारदर्शी ढंगले गफगाफ गरेको सुनिन्छ । यो भन्दा लज्जाबोध के हुन सक्छ रु’, संसदमा उनले प्रश्न गरे ।

सांसद श्रेष्ठले मन्त्री बन्नका लागि सभापति रवि लामिछाने कोर टिमले २ करोड रुपयाँ मागेको जिकिर गर्दै प्रसाईंसँग सहयोग मागेको अडियो आइतबार सार्वजनिक भएको थियो ।

अडियो प्रकरणबारे सर्वत्र चर्चा भइरहेको छ । अडियो सार्वजनिक भए लगत्तै रास्वपाले ७२ घण्टाभित्र कारवाही गर्ने गरी श्रेष्ठलाई निलम्बन गरिसकेको छ ।