काठमाडौं । अख्तियार दुरूपयोग अनुसन्धान आयोगले विशेष अदालतको फैलसाविरूद्ध सर्वोच्च अदालतमा पुनरावेदन दायर गरेको छ ।

विराटनगर भन्सार कार्यालयका तत्कालीन प्रमुख कृष्णबहादुर बस्नेतलगायत पाँच जनालाई सफाइ दिने विशेषको फैसलाविरूद्ध आयोगले पुनरावेदन दिएको हो ।

विशेष अदालतले बस्नेतसहित उनकी श्रीमती सबिता गौली बस्नेत, जेठान नविन कुमार गौली, शकुन्तला गौली(नवीनकी श्रीमती) र छोरा शुलभलाई सफाइ दिने फैसला गरेको थियो ।

यो फैसला गलत भएको दाबी पेश गर्दै आयोगले आज सर्वोच्चमा पुनरावेदन दिएको हो ।

उनीहरू ६ जनाविरूद्ध अख्तियारले १० करोड ५६ लाख १९ हजार ६०१ रूपैयाँ बिगो मागदाबीसँगै चल अचल सम्पत्ति जफतको माग गरेको थियो ।

विशेष अदालतले फैसला दिँदा उल्लेख गरेका आधारहरू त्रुटिपूर्ण भएको आयोगको दाबी छ ।