काठमाडौं । संसदको संसदीय सुनुवाइ समितिमा सांसदहरूको संख्या टुंगो लागेको छ ।

आइतबार बसेको कार्यव्यवस्था परामर्श समितिको बैठकले विभिन्न दलबाट समितिमा रहने सांसदहरूको संख्या टुंगो लगाएको कांग्रेसका प्रमुख सचेतक रमेश लेखकले बताए । उनका अनुसार तीन दलका शीर्ष नेताहरूबीच संसदीय सुनुवाइ समितिको सभापति नेपाली कांग्रेसले पाउने टुंगो भएको छ ।

सुनुवाइ समितिमा नेपाली कांग्रेस र एमालेका ५/५ जना, माओवादी केन्द्रबाट २, राष्ट्रिय स्वतन्त्र पार्टी, जनता समाजवादी र राप्रपालबाट १/१ सदस्य रहनेछन् ।

यसअघि राष्ट्रिय सभाबाट सुनुवाइ समितिमा रहने तीन जना सदस्यहरूको टुंगो लगाइ सकेको छ । जसमा माओवादी केन्द्रका जगप्रसाद शर्मा, एमालेका देवेन्द्र दाहाल र कांग्रेसका रमेशजंग रायमाझी सुनुवाइ समितिमा रहने छन् ।

संघीय संसदका दुवै सदनको संयुक्त समितिको रुपमा रहने १५ सदस्यीय संसदीय सुनुवाइ समितिमा राष्ट्रिय सभाबाट ३ जना रहन्छन्। समितिले संवैधानिक अंगका पदाधिकारी र विभिन्न देशका राजदूतहरूको नियुक्तिका लागि भएको सिफारिसमा सुनुवाइ गर्छ।