काठमाडौं । प्रस्तावित प्रधानन्यायाधीश सर्वोच्च अदालतका वरिष्ठ न्यायाधीश हरिकृष्ण कार्कीको संसदीय सुनुवाइ आज हुने भएको छ ।

प्रधानन्यायाधीशमा सिफारिसपछि संसदीय सुनुवाइ समितिले कार्कीविरुद्ध उजुरी आह्वान गरेको थियो । समितिका अनुसार, कार्कीविरुद्ध विभिन्न उजुरी परेका छन् । उजुरीको समयसीमा सकिएपछि समितिले सुनुवाइ गर्न लागेको हो ।

समितिले सुनुवाइका लागि उनलाई अहिले बिहान ८ बजे लेखा समिति हलमा उपस्थित हुन भनेको छ ।

संसद् सचिवालयका अनुसार सुरुमा उनले प्रधानन्यायाधीश भएपछिका अवधारणा र कार्ययोजना राख्ने छन् । त्यसपछि सांसदहरूले प्रश्न गर्ने र उनले त्यसको जवाफ दिने कार्यक्रम छ । सम्भव भएसम्म आजै सुनुवाइ सकेर नाम सिफारिस गरी प्रतिनिधिसभामा पठाउने तयारी छ ।