काठमाडौं । मुगुस्थित कृषि विकास कार्यालयका तत्कालिन निमित्त कार्यालय प्रमुख पञ्चलाल बुढासहित ६ जनाविरूद्ध अख्तियार दुरूपयोग अनुसन्धान आयोगले भ्रष्टाचार मुद्दा दायर गरेको छ ।

खत्याड गाउँपालिका वडा नं ४ स्थित खिराचौर कृषि सिंचाई निर्माण योजना अधुरो छोड्नेलाई कारवाही नगरी हुँदै नभएका काम पनि नापी किताबमा चढाएको आरोपमा उनीविरूद्ध मुद्दा दायर भएको हो ।

बुढाले हुँदै नभएको कामको प्रतिवेदन तयार गरी भुक्तानीको लागि टिप्पणी उठाउन लगाई उनले उपभोक्ता समितिलाई १२ लाख ८३ हजार ३४ रूपैयाँ दिएको पाइएको छ ।

उनीमाथि सोही रकम बराबरको बिगो सहित कैद सजायको मागदाबी कायम गर्दै आज विशेष अदालतमा मुद्दा दायर भएको हो ।

मुद्दा दायर हुनेमा तत्कालीन सब इन्जिनियर राजेन्द्र शाही, प्रा.स सहायक स्तर पाँचौ टेकबहादुर खत्री, उपभोक्ता समितिका अध्यक्ष हस्तबहादुर रोकाया, कोषाध्यक्ष अमना कुमारी रोकाया, सचिव भुवन रावल रहेका छन्।