काठमाडौं । पूर्वप्रधानमन्त्री एवं एकीकृत समाजवादी पार्टीका अध्यक्ष माधवकुमार नेपालले बालुवाटारको ललिता निवास जग्गा प्रकरणमा सरकारलाई पूर्ण समर्थन रहने बताएका छन् ।

मंगलबार बिहान नेपाल पत्रकार महासंघ पाल्पाले तानसेनमा आयोजना गरेको पत्रकार सम्मेलनमा बोल्दै उनले सरकारको काम कारवाहीमा आफ्नो समर्थन रहेको बताएका हुन् ।

‘सरकारी जग्गा हिनामिना प्रकरणमा जोसुकैले कसुर गरेको होस्, उसले दण्ड पाउनुपर्छ । जुनसुकै तहका मान्छेले बदमासी गर्न सक्छन्, त्यसमा जोडिएको, संलग्न, हिस्सेदार छ वा छैन भन्ने कुरासँग पनि जोडिएको हुन्छ । सरकारको काममा हाम्रो पूर्ण समर्थन रहन्छ,’ उनले भने ।

ललिता निवास प्रकरणमा नेपाल प्रधानमन्त्री हुँदा मन्त्रिपरिषद्बाट नीतिगत निर्णय गरेर भ्रष्टाचार भएको आरोप लागिएकोप्रति पनि उनले मुख खेलेका छन् । आफू प्रधानमन्त्री हुँदा ललिता निवासको जग्गा सरकारी हो कि होइन भनेर कानुनसम्मत रुपमा छुट्याएर अगाडि बढ्ने निर्णय गरेको उनको जिकिर छ ।