काठमाडौं । साउन २ गतेदेखि जारी नेपाली कांग्रेसको केन्द्रीय समिति बैठक आज समापन हुँदैछ ।

पार्टी कार्यालय सानेपामा बिहान ११ बजे बजेदेखि सुरु हुने बैठकलाई सभापति शेरबहादुर देउवाले बेलुकी ४ बजे सम्बोधन गर्दै समापन गर्ने तयारी रहेको छ ।

झन्डै ११ महिनापछि बसेको केन्द्रीय समिति बैठक महत्वपूर्ण निर्णय गर्दै समापन गर्ने तयारी छ । जसको लागि सभापति देउवाले मंगलबार पदाधिकारी बैठक बोलाएका थिए । कांग्रेस केन्द्रीय कार्यसमितिको बैठकका निर्णयको आवश्यक तयारीका लागि पदाधिकारी बैठक बोलाइएको थियो ।

केन्द्रीय कार्यसमिति बैठकका निर्णयको मस्यौदा लेख्न पाँच नेतालाई जिम्मेवारी तोकिएको छ। पदाधिकारी बैठकले महामन्त्रीद्वय गगन थापा, विश्वप्रकाश शर्मा, नेता रमेश लेखक, प्रवक्ता प्रकाशशरण महत र प्रचार विभाग प्रमुख मीन विश्वकर्मालाई मस्यौदा लेखनको जिम्मेवारी दिएको हो।